話說我統籌公司某個線上項目，原意是加強客戶和公司銷售和後勤團隊的溝通，咁呢啲野一定係givers gain，你要先付出然後先會有機會有收穫，你要先提供content、寫文、留言帶起個頭，炒旺左個場，人地先夠膽跟牌，先夠薑留言架。
今日開會，我攤個report出黎，所有文都係我寫，所有comment都係我自己用另一個account留… 喂，大家同team你仲要係我直屬上司，個project你lead架，這三個月以黎面對面請你俾文請你留言，唔肯；咁email追囉，唔覆。開會時仲要一臉驚訝咁問：點解咁少人回覆架？你快啲諗方法叫其他部門呀頭寫野啦。
大佬，唔好咁癡線啦，你自己都唔留言唔share唔寫文，人地部門呀頭點解要幫你抬轎？係呀，叫人去衝之後自己走左去咁囉，呢個畫面真係似曾相識。呢個project望落去，就好似倒左一斤砒霜落去嘅糖水，仲杰過芝麻糊，呢啲咁嘅野你搵邊個同你啃？那一個Department head不是修練千年成精的老狐狸？飲啦，飲左識飛架，豬到好似你咁都唔落搭啦，你覺得班老狐狸望住呢鑊杰撻撻的project會死錯人？係呀係呀，寫完啲文就會生意興隆風生水起全家幸福呀，咁閤家富貴你自己唔寫先？真係咁多人寫唔見你寫？
老闆一定唔會get his hands dirty，但冇叫你扔我落化糞池呀。呢單野一定係我同你呢個senior manager硬食架啦，你都當埋自己係高層大老闆等運到，仲要推我去搵班坐房的叫佢地contribute，平時領功面聖唔見你帶我去？仲要叫我Agressive啲？我行入去除tie再解鈕跳熱情的沙漠好冇？我咩新絲蘿蔔皮，又點行入佢地間房sell呢個我地team做出黎，但全team都唔會用兼唔會支持的project呀？我行到入房同佢講：well，其實我地都through 呢個project 搵左好多客架啦，我呢輪都賺夠啦，真係想俾其他人賺下！
大佬，我咁都sell到，我唔駛喺度做，轉左行賣瑞士山區肺啦，駛依家同你癡癡呆呆坐埋一枱咩？
#多難興邦
#每日一癲
#同事三分親
Search